قصص اطفال قبل النوم

قصص اطفال قبل النوم باللغة العامية  حينما يحل المساء ويخلد الأطفال إلى النوم، نجد ان الكثير منهم لا يستطيع ان ينام الا ان قامت الأم بقص عليه بعض من القصص الجميلة، فقد يتحول هذا الأمر بمثابة عادة لا يستطيع الاستغناء عنها قبل النوم، وقد تقع العديد من الأمهات في حيرة لأنها لا تمتلك القصص الكافية التي تستطيع أن تقصها على صِغارها، لذلك سوف نقدم لكِ اليوم من خلال موقع زيادة بعض القصص الجميلة والقصيرة مكتوبة باللغة العامية حتى يسهل عليكِ قراءتها من اجل طفلك.

شاهد ايضا اجمل قصص للاطفال من اجل طفلك سوف تجدينها من خلال هذا الموضع: قصص اطفال قبل النوم قصيرة جدا لينام الأطفال بسرعة

قصص اطفال قبل النوم باللغة العامية

سوف نقدم لكم مجموعة متنوعة من قصص المشوق للاطفال باللغة العامية، والتي لها العديد من المعاني الهادفة، ومن هذه القصص:

قد يهمك ايضا معرفة افضل القصص المشوقة للأطفال: قصص اطفال قبل النوم طويلة مكتوبة مشوقة جدًا

قصة الأرنب المغرور والسلحفاه

كان زمان في يوم من الأيام في غابة جميلة وكبيرة، بيعيش فيها كل الحيوانات مع بعض بسلام، وكمان كان بيعيش فيها أرنب جميل بس كان مغرور، لأنه كان دايمًا بيقول: أنا سريع جدًا، وفي الغابة دي كلها مافيش حد أسرع مني، وفي يوم من الأيام الأرنب كان ماشي في الغابة وقابل سلحفاة تمشي ببطء لأن رجلها صغيرة، فضحك عليها الأرنب المغرور، لأن هو رجليه طويلة وبيقدر يجري بيها بسرعة، قال لها: مالك تمشي ببطء كده ليه يا ضعيفة، قالت له السلحفاة: أنا مش ضعيفة، ولو عايز تشوف تعالى نعمل سباق جري، الأرنب المغرور على طول وافق وقال في نفسه: أنا أسرع منها أكيد أنا ح أسبقها، أنا ح أنام تحت الشجرة شوية وبعدين أقوم أجري وأسبقها لأنها بطيئة جدًا، السلحفاة بصت لاقت الأرنب نام ما بطلتش مشي وكملت السباق، الأرنب راحت عليه نومه، ولما صحي كانت السلحفاة النشيطة وصلت لنهاية السباق وهو ما قدرش يحصلها، وبكده فازت السلحفاة على الأرنب المغرور، ومن يومها والأرنب بطل غرور اتعلم إن القوة في العقل مش في الجسم.

للحصول على قصص قصيرة ومفيدة شاهد هذا الموضوع: 10 قصص قصيرة مفيدة وطريفة مكتوبة كاملة

قصة الأرنب المتمرد

كان ياماكان فيه بيت صغير في الغابة، بيعيش فيه الأرنب الصغير مع مامته، ماما الأرنب ده كانت بتحبه جدًا وتعتني بيه، وفي يوم من الأيام صحا الارنب المتمرد لقى مامته محضرة له الفطار وهو كان جعان، نط من السرير وراح يجري علشان ياكل، لكن الأرنب لما وصل الترابيزة اللي مامته محضرة له عليها الفطار اتمرد على الأكل اللى عليها، وقال لمامته: هو كل يوم آكل خس ومعاه جزر، في الفطار والعشا والغدا، مامته ردت عليه وقالت له: بس ده ياحبيبي هو الأكل اللي الأرانب بياكلوه، الأرنب المتمرد رد على مامته وقال: لا أنا زهقت، مش عايز آكل الأكل ده، أنا ح أروح أدور على أكل تاني أحسن من الأكل اللي زهقت منه ده، وخرج الأرنب المتمرد يجري ويدور في الغابة على أكل يأكله غير الخس اللي معاه الجزر، وفي الطريق قابل الأرنب المتمرد كلب بياكل، سأله الأرنب: إنت بتاكل إيه؟ أنا جعان، ممكن آكل معاك؟ رد عليه الكلب وقاله: أنا بآكل عظم، هو ده اللي الكلاب بتاكله، شكره الأرنب وقاله: شكرًا بس أنا أرنب مش بعرف آكل العظم، وكمل الأرنب مشي يدور على حاجة ياكلها، وهو ماشي لقى قطة تاكل، سلم عليها الأرنب المتمرد وقالها: أزيك يا قطة، أنا جعان عايز آكل، ردت عليه القطة وقالت له: ازيك يا أرنب، أنا بآكل سمك وبشرب لبن، هو ده اللى القطط بتاكله، رد عليها الأرنب: شكرًا يا قطة بس أنا أرنب، مش باكل السمك ولا بشرب اللبن، تعب الأرنب المتمرد من المشي والجوع، لكن وهو في طريقه في الغابة قابل الأسد وكان هو كمان بياكل، الأرنب قاله: ازيك يا أسد، أنا جعان وعايز آكل، انت بتاكل إيه؟، رد عليه الأسد وقال له: أنا باكل لحم الحيوانات والأرانب، الأرنب خاف جدًا لما عرف إن الأسد ممكن ياكله، وطلع يجري ورجع البيت، وحضن مامته وقال لها: سامحيني ياماما، أنا كنت غلطان، وعرفت إن كل واحد لازم ياكل الأكل اللي يناسبه، وح آكل معاكي كل يوم الخس ومعاه الجزر، فرحت بيه مامته وحضنته، وقالت له: لازم يا حبيبي ما نتمرد على الأكل، ونرضى بالنعمة اللي ربنا أعطاها لنا، ومن يومها والأرنب مش بيأكل غير الخس ومعه الجزر وبيحمد ربنا على نعمته.

تعرف على أفضل قصص للأطفال مسلية ومشوقة من خلال الاطلاع على هذا المقال: قصص أطفال طويلة مكتوبة مسلية ومشوقة

قصة الأرنب الأناني والبطة الطيبة

كان فيه غابة جميلة فيها حيوانات كتيرة سعيدة، وكان من بين الحيوانات أرنب صغير عايش في الغابة، بس الأرنب ده كان أناني جدًا، مش بيحب غير نفسه، وبيزعل لما يشوف حد مبسوط، ويفرح لما يشوف حد زعلان، وفي يوم من الأيام كان الأرنب الصغير بيلعب بالكرة بتاعته عند البحيرة الصغيرة اللي في الغابة، وكان في البحيرة دي بطة صغيرة بتعوم، ولما شافت الأرنب الصغير بيلعب فضلت تراقبه وهي مبسوطة، الأرنب كان بيلعب بالكرة عند شجرة عليها عش عصفورة فيه البيض بتاعها، الأرنب وهو بيلعب خبط الشجرة دي بالكرة هز العش وقع منه بيضة واتكسرت، الأرنب الصغير خاف وأخد الكرة بتاعته وراح يلعب بالكرة بعيد عند شجرة تانية، الشجرة التانية كان عليها عش بتاع النحل وفيه عسل، العسل ده كان فيه دب بياكل منه لأنه بيحب العسل أوي، الأرنب الصغير وهو بيلعب بالكرة ويخبطها في الشجرة، العسل وقع من على الشجرة وسال على الأرض، الأرنب الصغير خاف وأخد الكرة بتاعته وجري تاني عند البحيرة، ولعب بالكرة بتاعته وكان هناك البطة الصغيرة، فرحت البطة إن الأرنب الصغير رجع تاني طلعت من الميه وقالت له: ممكن ألعب معاك بالكرة؟ رد عليها الأرنب وقال لها: لا مش بحب إن حد يلعب معايا، البطة الصغيرة زعلت ومشيت بعيد ونزلت في البحيرة تاني، والأرنب الأناني كان مبسوط لأنه شاف ملامح البطة وهي زعلانة، وفضل يلعب بالكرة لحد ما اتخبطت الكرة جامد في الشجرة ووقعت في البحيرة، البطة الصغيرة جرت على الكرة ومسكتها وطلعت من البحيرة وقدمت الكرة للأرنب، الأرنب اتكسف أوي لأنه زعل البطة وهي علشان طيبة جابت له الكرة، قال لها سامحيني أنا زعلتك لاني لم اوفق ان تلعبين معي، لكن انتي رجعتيلي الكرة بتاعتي، قالت له البطة: علشان أنا بحب أشوف الناس سعداء، حتى لو كنت أنا حزينة، اتأثر الأرنب جدًا من كلام البطة، ومن يومها وهما الاتنين أصحاب وبيلعبوا مع بعض، والأرنب بطل يبقى أناني واتعلم إنه يسعد الناس ويساعدهم باللي يقدر عليه.

تعرف على أقوى مجموعة من قصص الاطفال قبل النوم من خلال قراءة هذا الموضوع: قصص أطفال قبل النوم

قصة عم صالح والقناعة

في يوم من الأيام كان فيه رجل اسمه عم صالح فقير وبيشتغل  عامل في مصنع وكان عنده أولاد وزوجة ، لكنهم كانوا يعيشوا في فقر وبيتهم صغير ومكسر، ومافيش عندهم أكل إلا القليل، وكان عم صالح مش راضي بعيشته ودايمًا يشتكي من الفقر وقلة الأكل، ويقول: ليه أنا فقير وبيتي مكسر ومافيش غير أكل قليل في البيت؟، وكان عم صالح يحقد على الناس اللي عندها بيوت كبيرة وسيارات ومعاهم مال، في يوم من الأيام كان عم صالح راجع من المصنع قابل في الطريق رجل يلبس ملابس أنيقة ويركب سيارة حديثة، ولكنه كان بيبكي بكاء شديد ويبدو عليه المرض، قرب منه عم صالح وسأله: ليه بتبكي إيه اللي مزعلك؟ الرجل رفع رأسه ونظر لعم صالح وعنيه بها دموع وقال له: أنا بأبكي على حالي، استغرب جدًا عم صالح وفكر في نفسه إيه اللي ممكن يزعل رجل عنده كل النعم دي اللي مش عندي منها ولا شيء، الرجل رد على عم صالح وقال له: أنا بأبكي لأن عندي فلوس كتير لكن مش قادر أتمتع بيها، لأني مريض وكبرت في السن ومافيش عندي أولاد يحملوا إسمي من بعدي، تأثر عم صالح بحال الرجل وفكر في نفسه، وقال: الحمد لله،  أنا ما عنديش فلوس ولا عربية ولا بيت كبير، بس عندي صحة وعندي أولاد يحملوا إسمي من بعدي، ومن يومها وعم صالح أصبح راضي بحاله يحمد ربه ليل نهار على النعم اللى أنعم بيها عليه.

شاهد أفضل الرسومات عن اليوم الوطني السعودي من خلال زيارة هذا اللينك: رسومات عن اليوم الوطني وفعاليات اليوم الوطني السعودي

في ختام هذا الموضوع قدمنا لكم اجمل قصص اطفال قبل النوم باللغة العامية حيث تتميز هذه القصص بان لها مغزى أخلاقي لتعليم طفلك مبادئ جميلة في صورة هذه القصص.